Publicidad

James Rhodes, o inesperado embaixador ferrolán: «Estou totalmente namorado»

M. CORRAL | Ferrol | Domingo 6 febreiro 2022 | 19:52

James Rhodes chegou, papou, paseou, fotografou, namorou, tocou o piano e marchou deixando un baleiro que non será doado de encher nos vindeiros días. O escritor e pianista de orixe británica, nacionalizado español e amante da boa vida, a gastronomía e o galego, cativou ao público que agardaba por el sen importar os aprazamentos aos que obrigou a pandemia.

O paso de Rhodes por Ferrol fixo máis pola autoestima do pobo ferrolá e pola proxección turística da zona que moitos dos políticos que pasaron pola praza de Armas. O artista, que tamén dispara unhas belísimas fotografías e adoita publicalas nas redes sociais, mirou con tino algúns dos recunchos que pasan desapercibidos a ollos poucos observadores.

A súa viaxe comezou en Barajas o venres. Dende alí, mirando os hipnóticos teitos da T4, desvelou aos seus que estaba de camiño a Ferrol:

Sería esta unha das últimas veces que empregou nestes días o castelán porque o galego foi a lingua elixida por el para expresarte, como tivo feito noutras ocasións, estando ou non en Galicia. Pouco despois anunciaba que estaba chovendo, pero que iso era como «andar na poesía».

Un dos locais elixidos por Rhodes para comer foi o Josefa’s, na rúa San Francisco, —como xa adiantamos hai dous días— onde probou as súas «patacas bravas para morrer» e deu as grazas por «un xantar tan delicioso»:

Tivo tempo o pianista para pasear por Ferrol Vello e A Magdalena, disparando coa súa cámara unhas imaxes moi artísticas e especiais:

De feito, unha das casas que agarda aínda pola rehabilitación no barrio portuario foi a elixida por Rhodes para unha hipotética futura compra:

O amencer de Rhodes desde o seu hotel na zona da Gándara serviulle para gabar a luz de Ferrol:

Para o almorzo, elixiu despois o Lusitania, na rúa Real, dando boa conta de unha das súas especialidades: os pastéis de Belém.

Tendo en conta os lugares dos que estaba dando conta, non sorprendeu que James ficara «totalmente namorado» de Ferrol:

Tivo tempo tamén a unha sesta antes de chegar ao ensaio no Auditorio:

Quedou prendado namorado dese skyline de guindastres que tanto conta desta cidade que xa foi máis naval do que é:

Unha cidade da que, supoñemos que grazas aos regalos institucionais do Concello, poderá sabelo case todo:

A mostra de neo ferrolanismo de Rhodes chegou ata a vicepresidenta segunda do Goberno, a paisana Yolanda Díaz, que presumiu de cidade e deu pé a que o artista fixera unha graza co tema de moda: o erro do deputado do PP que serviu para aprobar o decreto da reforma laboral.

Rhodes volveu publicar o ceo para dar os bos días e adiantar que xa tiña «morriña»:

O rexedor, Ángel Mato, que comentou varias das publicacións de James no Facebook, pediulle que non marchara sen coñecer as praias, un dos comentarios máis repetidas nas reaccións ás publicacións do pianista:

Non sabemos se tivo tempo ou non, porque a seguinte foto xa foi de volta en Madrid:

En todo caso, sumámonos á petición do alcalde e convidamos a Rhodes a que regrese sempre que precise dilatar o tempo un pouco. Grazas, James.