FERROL360 | Lunes 7 mayo 2018 | 12:09
Ferrol acollerá de maio a xuño o Mes das Letras con Apego 2018. Trátase dunha morea de actividades vinculadas a rede Apego, cun total de sete actividades diferentes os días 8, 12, 15, 22 e 29 de maio e 12 e 19 de xuño.
Estes eventos afondarán na educación en igualdade desde idades moi temperás, con propostas como vellos contos con novos finais, e tamén na importancia do xogo tradicional con charlas para familias.
A primeira actividade do programa será o 8 de maio as 18:30 horas, trátase dun espectáculo musical chamado «Radio Bule Bule» para nenos de 0 a 3 anos.
Co gallo do Día das Letras Galegas, o sábado 12 de maio as 12:30 horas terá lugar un contacontos centrado na figura de Victoria Moreno. Namentres, o martes 15 as 18:30 horas será o turno de «Contos Vellos, Novos Finais».
A entrada a estes tres eventos é de balde e será por orde de chegada ate completar a capacidade da capela do Centro Cultural Torrente Ballester, que será o esceario que acolla estas actividades.
O resto dos espectáculos requiren de inscripción previa por teren prazas limitadas. Entre eles atopamos actividades como «Fálame moito e ben» un obradoiro para familias de 0 a 6 anos o 22 de maio, «Xogamos», sobre o xogo tradicional para familias de 1 a 6 anos o 29 de maio e «Contacontos de Pablo Díaz e concerto» de 0 a 4 anos o 12 de xuño.
A última actividade será «Percubebés, de Urdime», percusión en concerto para nenos de 0 a 4 anos de Marcelo Dobode e Bea Martínez, con dous pases as 18:00 e as 19:00 horas o 19 de xuño. Para anotarse en calquera dos catro eventos basta con mandar un correo cos datos persoais a gnl@ferrol.es.