FERROL360 | Sábado 28 maio 2016 | 16:21
Corredores de todas as idades participarán este domingo na terceira carreira popular de San Sadurniño, que percorrerá o contorno do paseo fluvial. 823 persoas tomarán parte nesta proba, o que supón 120 participantes máis ca na pasada edición. Ademais, hai 14 equipos apuntados dos que 8 son do municipio e estímase que vai correr arredor do 90 % do alumnado de secundaria do CPI.
A maioría dos corredores inscribíronse para a proba absoluta de cinco quilómetros, mentres que os restantes se reparten polas carreiras escolares que percorrerán só a zona do Arboredo de especies do país. A saída da primeira carreira darase ás 11:10 horas para a categoría Escolares A, tanto masculina como feminina -anos 2004, 2005 e 2006-, sobre unha distancia de 1.000 metros arredor do paseo fluvial.
Vinte minutos despois sairá a rapazada inscrita en Escolares B e C -2002/2003 e 1999/2001- e as persoas participantes na categoría adulta, é dicir, todas as que teñan máis de 13 anos. Neste caso percorrerán 5.000 metros pasando por diante de Intasa, pola estrada de Ferreira e volta de novo á leira da Cortiña.
Prevese que a proba de infantís e maiores dure arredor dunha hora. Por iso se fixou para as 13.00 h. a saída da categoría de benxamíns -anos 2007 e 2008- e para as 12:50 horas a de pitufos, na que participarán nenas e nenos nacidos en 2007/2008. En benxamíns correrán 400 metros e en pitufos só 220 sen saír sequera do Arboreto de especies autóctonas. Por último, ás 13:00 horas tamén se lle dará a saída á categoría biberóns -2011 e 2012- que só terán que botar unha carreira de 70 metros.
Co gallo da carreira permanecerá cortado entre as 9:30 e as 12:45 horas un carril da DP-7601, concretamente o que vai en sentido San Sadurniño-Ferreira. Co mesmo horario tamén se cortará a estrada da Bidueda-Campolabrado entre o cruzamento coa DP-7601 e o desvío que leva a Intasa situado un pouco máis adiante de Metalfra. Por último tamén se pechará a circulación de 9.00 a 13:30 horas na pista que vai desde A Cortiña ata Cornide.
Corre polo Norte
A III Carreira popular Concello de San Sadurniño está organizada polo propio Concello, o CPI e a Federación Galega de Atletismo, que se encargará da cronometraxe. A proba enmárcase no I Circuito Corre polo Norte, que, despois de San Sadurniño, levará o atletismo a Moeche -sábado 4-, a Valdoviño -o 18 de xuño-, a Cerdido -9 de xullo-, a Ortigueira -13 de agosto- e, por último, a Mañón o 4 de setembro.
O circuito prevé premios en metálico para a ganadora e ganador absolutos da rolda de oito carreiras. Hai máis información nesta web.