FERROL360 | Domingo 4 octubre 2015 | 15:20
A Biblioteca Municipal de Narón acollerá o vindeiro sábado, 10 de outubro, un obradoiro de audiovisuais para adultos con motivo do Día da Biblioteca, que terá lugar o 24 deste mes.
A actividade, gratuíta, consiste en aplicar a técnica do Light Painting á fotografía, xogando coa cámara e coa luz directa nas imaxes, onde quedarán reflectidas liñas e formas xeradas con trazos de luz.
Para participar neste obradoiro é preciso ter o carné de socio da biblioteca e inscribirse previamente. O prazo para anotarse abrirase este luns ás 16:00 horas, e as persoas interesadas en asistir deben facilitar os seus datos no mostrador das instalacións –localizadas na rúa 25 de Xullo- ou chamando por teléfono ao número 981 382 173. A actividade desenvolverase en horario de mañá, desde as 11:45 ata as 13:30 horas.
As imaxes realizadas durante a convocatoria permanecerán expostas na Biblioteca Municipal de Narón ata o vindeiro 24 de outubro.
As persoas con fillos a partir de 3 anos poderán deixar aos menores no centro, realizando actividades específicas programadas para eles mentres se desenvolve o citado obradoiro.