FERROL360 | Xoves 17 setembro 2015 | 10:16
O Pazo da Cultura de Narón acollerá este venres a estrea da comedia Presidente, que a compañía Teatro do Morcego representará ás 20.30 horas e o sábado día 19 ás 20.00. Os actores Celso Parada, Merce Castro, César Goldi, Federico Pérez e a naronesa Iolanda Muíños, exalumna da Escola de Actores e Actrices de Narón, interpretan esta obra de Xosé Luis Prieto.
Os espectadores trasladaranse a unha campaña electoral e verán como un presidente do goberno tenta revalidar o seu cargo visitando persoalmente aos votantes, familias de moi diversa índole e que reaccionarán dun xeito moi distinto ao recibir esta visita.
A Concellería de Cultura de Narón, que dirixe a edil Marián Ferreiro, colabora na produción desta comedia teatral. O prezo do espectáculo é de 9,50 euros para o público en xeral e de 6,65 para abonados, persoas con carné xove ou de estudante, ata 25 anos, e desempregados.
As entradas están xa á venta na taquilla do Pazo da Cultura, ao igual que as dos espectáculos que terán lugar ao longo deste mes de setembro.