FERROL360 | Luns 23 marzo 2015 | 15:01
O título de campiona galega de Remo Olímpico e a medalla de bronce no estatal valéronlle a Noemi Martín o premio de mellor deportista cedeiresa do ano. Os méritos de Noemi avalan o seu nomeamento, xa que tamén é campiona galega de remoergómetro, tanto en individual como por equipos. O alcalde, Luis Rubido, entregoulle o galardón no marco da XIV Festa do Deporte de Cedeira o pasado venres.
A deportista competía por este premio con atletas de altísimo nivel nas categorías de remo masculino (Raúl López), fútbol (o primeiro equipo do Cedeira SD), deportes adaptados (Cristian Crespo), bádminton (Elena López e Diego Loureiro), natación (equipo alevín do Club Natación Cedeira), hípica galega (Fernando Mera), BTT enduro (Raúl Bustabad), jiu-jitsu brasileiro (Andrés Rodríguez), triatlón (equipo de triatlón do Club Natación Cedeira), atletismo (equipo de atletismo do Club Natación Cedeira) e karate (Santiago Cortizas). Todos eles, propostos polos seus respectivos clubes.
A Festa do Deporte pretende recoñecer o esforzo, a adicación, méritos e outros valores dos mellores deportistas cedeireses do ano. Tamén se entregaron as mencións especiais, nas que se destacou o traballo e bo facer doutros deportistas e xente relacionada coa familia deportiva cedeiresa. Estes foron a Asociación Sobre Rodas; Óscar Pérez (O Parrulo FS); Alejandro Martínez e Bernardino Rodríguez (Cedeira SD) e Dolores López, Hilda Martínez, Josefa Pérez e Mercedes Díaz (Bádminton Cedeira).
Enrique Losada (a título póstumo, da Sociedade Caza e Pesca), o equipo sénior do Taekwondo Cedeira, Daniel Galdo (Kickboxing) e José Luis Bellas “Telís”, pola súa traxectoria de toda unha vida adicada ao fútbol dende xogador, adestrador e presidente. Completaba esta lista a homenaxe que se lle rendiu a Rosi García, traballadora da concellería de Deportes, cuxo pasamento deixou un fondo pesar no departamento municipal e tamén en moitos dos veciños de Cedeira, xa que foi mestra de milleiros de nenos que, con ela, aprenderon a nadar.
Publicidad
