FERROL360 | Xoves 30 outubro 2014 | 14:16
O Concello de Neda e a Garda Civil organizan unha serie de charlas gratuítas en materia de seguridade nas que se tratarán os perigos de Internet e as redes sociais, así coma da mellora da seguridade dos nosos maiores. As sesións celebraranse entre o 4 de novembro e o 29 de abril nos diferentes locais sociais das entidades veciñais de Neda e comezarán as 18:00 horas.
As charlas están incluídas no Plan Maior Seguridade da Secretaría de Estado do Ministerio do Interior e serán impartidas polo persoal formador da Garda Civil. A primeira conferencia celebrarase o próximo martes 4 de novembro no local da AVV de Anca e ten por título «Os perigos de Internet e as redes sociais».
Esta sesión ten como obxectivo fundamental potenciar a máxima información sobre os principais perigos que hai detrás de Internet e a necesidade de protexer sempre a identidade e a privacidade persoal, moi concretamente as fotografías e vídeos, para evitar que cheguen aos ciberdelincuentes ou ciberacosadores.
Esta mesma charla repetirase o día 17 de novembro no Roxal, o 29 de xaneiro en Viladonelle e o 23 de febreiro na Casilla do Puntal.
Así mesmo, no marco deste programa, celebraranse tamén charlas baixo o título «Prevención e mellora da seguridade dos nosos maiores». A primeira destas sesións será o 9 de marzo no Roxal; seguenlle o 25 de marzo en Anca, o 17 de abril en Viladonelle e o 29 do mesmo mes no Puntal.
Neste caso o obxectivo é facilitar información aos maiores dos riscos que constitúen unha maior ameaza para a súa seguridade e as medidas de prevención dos mesmos. Trataranse temas como o maltrato das persoas maiores no ámbito familiar e residencias; medidas de prevención de roubos nos domicilios; prevención de tiróns, furtos e roubos no entorno das entidades financieras, etc.
Ao mesmo tempo, trátase de fomentar a confianza das persoas maiores nas Forzas e Corpos de Seguridade e desenvolver conductas proactivas para a denuncia das situacións e delictos dos que poden ser vítimas.