FERROL360 | Venres 26 decembro 2014 | 13:28
A partir do día 2 e ata o 13 do mes de xaneiro, as familias poderán formalizar a matrícula para a escola infantil municipal de San Sadurniño. Segundo o Concello, nos últimos días recibiron xa un total de 18 solicitudes de prematrícula.
Unha vez rematado o prazo de matrícula, nos días seguintes procederase á baremación, á proposta inicial de admisións e exclusións e abrirase un periodo de reclamacións, do 19 ao 24 de xaneiro, que quedarán resoltas e publicadas o día 26.
Do 27 ao 29 de xaneiro notificaráselles ás familias admitidas a cota que deberán satisfacer antes do día 31 de xaneiro, data na que se elaborará o listado definitivo de prazas cubertas. A partir de aí o pagamento do servizo farase mes por mes.
Cómpre ter en conta que no mes de marzo se abrirán dous prazos para o curso 2015-2016, un para a reserva de praza dos nenos matriculados este ano e outro para as novas incorporacións.
O Concello prevé que daquela se incremente o número de solicitudes, dado que hai familias que nestes momentos levan ós cativos a centros de fóra de San Sadurniño.
Como complemento á apertura do prazo de matrículas, o Concello organiza para os días 4 e 5 de xaneiro dúas xornadas de portas abertas entre as 16:00 e as 19:00 horas.