FERROL360 | Mércores 2 marzo 2016 | 12:58
A Deputación Provincial de A Coruña investirá 3.652.063 de euros en obras de mellora e conservación nas estradas da rede provincial nas comarcas de Ferrolterra, Eume e Ortegal. O paquete de actuacións na provincia sumera os 27 millóns de euros.
O deputado responsable da área de Vías e Obras, José Manuel Pequeño, salientou o importante ritmo inversor que se está a realizar, grazas a unha xestión eficaz dos recursos, e subliñou o efecto que esta activación terá «tanto na mellora das infraestruturas viais como na creación e mantemento do emprego nas numerosas empresas da provincia que se encargan de realizar os traballos».
A Deputación da Coruña licita actualmente obras de mellora e conservación na rede provincial de estradas por importe de 16.128.239,40 euros, ao que hai que sumar o Plan de Conservación de Estradas 2016, que ascende a 11,3 millóns de euros e que contempla a execución de distintos traballos de mellora do firme, rebacheo e limpeza de cunetas na rede viaria provincial.
Pequeño explicou que o feito de que o Plan de Conservación fose aprobado anticipadamente a finais de 2015, «vai a permitir axilizar a contratación e execución das obras incluidas no mesmo e realizalas durante a época de bó tempo, de xeito que a maior parte delas estean rematadas antes da época estival».
Ademais destes importantes investimentos, o organismo provincial aprobou en pleno 1,5 millóns de euros máis para sete proxectos de mellora en estradas provinciais que saíran a licitación próximamente e está a levar a cabo expropiacións noutros sete viais por importe de preto de 4 millóns.
Actuacións nas comarcas
En Pontedeume procederase a realizar o reforzo de firme con mestura asfaltica en quente na DP 6902 Pontedeume – Pedra de Auga. O fin de presentación de ofertas será o día 26 de marzo e o orzamento ascende aos 92,309.54 euros.
No mesmo municipio levarase a cabo o reforzo do firme no CP 4803 Miño – Pontedeume por 313,384.68 euros. P fin de presentación de ofertas será o día 14 de marzo.
En Cariño e Cedeira procederase á pavimentacion e mellora da Dp 2205, San Andrés de Teixido – Pedra. A data fin de presentación de ofertas é o 9 de marzo e esta obra conta cun orzamento de 835,454.62 euros.
Por último, en As Pontes levarase a cabo o ensanche e pavimentacion con mestura asfaltica en quente en DP 1802 Veiga de Cabana – As Pontes. A presentación de ofertas finalizará o día 9 de marzo o orzamento é de 165,476.53 euros.
Obras do Plan de Conservación
En canto ás obras do Plan de Conservación de estradas, en Ortigueira o orzamento ascende a 376.140,89 euros; en Cariño a 155.325,05 euros; Mañón e As Pontes recibirán 315.565,35 euros; Cedeira, Cerdido e Valdoviño 361.002,68 euros; Ferrol e Narón 288.957,73 euros; Moeche, San Sadurniño e As Somozas 261.702,60 euros; Ares, Fene, Mugardos e Neda 160.601,70 euros e Cabanas, Miño, Paderne e Pontedeume 326.148,20 euros.
Debate sobre el post