FERROL360 | Sábado 26 setembro 2015 | 16:28
A experiencia das Aulas de Simulación da Xerencia Integrada de Ferrol amosouse a pasada fin de semana no HPSN Europe, Human Patient Simulation Network, que se celebrou en Madrid. Baixo o lema «Saúde centrada na persoa: Deseñando solucións de simulación exitosas» o encontro reuniu a usuarios de simulación clínica de todo o mundo.
Os profesionais da Xerencia Integrada de Ferrol presentaron cinco talleres no espazo Simulación LowCost. Así, amosaron a súa experiencia coa simulación nos ámbitos da laparoscopia, cirurxía menor, de vías centrais con e sen control ecográfico, en drenaxe endotorácico e un taller relativo á paracentese.
A simulación é recrear de forma artificial procesos reais para conseguir o obxectivo da aprendizaxe. Trabállase con manequíns, aparellos e materiais que simulan distintas partes do corpo sobre as que practicar. A simulación permite un primeiro coñecemento teórico da técnica que se vai realizar, e facelos primeiros adestramentos clínicos antes da súa aplicación real ó paciente
Aproveitamento de recursos
As aulas de Ferrol son un proxecto integrador baseado na reutilización dos propios recursos para a formación dos novos residentes e a formación continuada do persoal sanitario. Na actualidade estanse a desenvolver de xeito continuo cursos programados. Lembrar que é o segundo espazo para a simulación nos centros hospitalarios galegos, e a primeira experiencia deste tipo en Galicia.