FERROL360 | Domingo 25 setembro 2016 | 23:05
A Concellería de Medio Ambiente de Cedeira, que dirixe Camilo Casal, organiza o I Seminario de Introducción á Eficiencia Enerxética, que se impartirá entre o luns 17 e o venres 28 de outubro. A actividade enmárcase dentro do Plan municipal de eficiencia enerxética, iniciado a principios deste ano.
O curso vai dirixido a desempregados ou persoas en activo que desexen explorar o campo da eficiencia enerxética aplicada a multitude de sectores como o mercado enerxético -libre e regulado-, a iluminación, climatización, edificación, así como os distintos modelos de negocio existentes a través de innovadoras fórmulas de inversión.
Pola natureza da formación, que pretende ser introdutoria, non é necesaria ningunha titulación técnica senón interese polo emprendemento e pola reciclaxe profesional. O programa, que terá 40 horas de duración, impartirase integramente no Instituto Punta Candieira de Cedeira en horario de 9:00 a 13:00 horas. Ofertaranse un máximo de 30 prazas.
Un total de cinco profesores especializados e con ampla experiencia serán os encargados de impartir as sesións, que tratarán sobre a enerxía, o mercado enerxético, a eficiencia nas empresas, as enerxías renovables, a iluminación interior e exterior, o modelo de negocio das ESCO, a consultoría enerxética, a implantación de sistemas de xestión SGEn para ISO 50001:2011, normativa e regulación e a eficiencia na edificación.
As persoas interesadas poden inscribirse no enderezo electrónico: seminarioemprendedorescedeira@gmail.com indicando o seu nome e apelidos e un teléfono de contacto, antes do día 7 de outubro.