FERROL360 | Luns 15 decembro 2014 | 17:38
«A rebelión dos robots», de Tatiana Luaces Fraga de 3º de ESO do CPI A Xunqueira foi o relato gañador do premio Ciencia contada e debuxada na categoría ESO. Mentres que «Baixo a sombra do pasado», de Marina Veiga Paz e tamén de 3º de ESO do CPI A Xunqueira alzouse co segundo premio nesta mesma categoría.
«Os nosos favoritos», da aula de Infantil de 3 anos do CPI A Xunqueira gañou o primeiro premio
de debuxo na categoría de Educación Infantil. Mentres que «Invisibles«, da aula de 6º de Primaria do CEIP Os Casais logrou o primeiro premio de debuxo pero na categoría de Primaria. O segundo premio foi para «Ciencia e vida é a mellor compañía», de David Parga Torrente, alumno de 5º de Primaria do CPI A Xunqueira.
Os premios Ciencia contada e debuxada enmárcanse dentro do programa «Fene, coa ciencia en galego», que é unha iniciativa conxunta dos centros de ensino da localidade e
o Concello de Fene.
Este certame de debuxos e relatos curtos relacionados coa ciencia e a ciencia-ficción trata de pór en valor a importancia da I+D+i no desenvolvemento económico e benestar da sociedade e un maior recoñecemento social destas actividades, así como un achegamento ao traballo científico e ás profesións de científicos e tecnólogos. A el se presentaron preto de medio centenar de traballos.
