FERROL360 | Luns 18 maio 2015 | 18:27
O Concello de Fene retoma este martes as sesións do programa «Espazos Familiares», dirixidos ás familias dos estudantes de Primaria e Secundaria que participan nos proxectos «Espazos Compartidos» e «Suma e segue». En todo caso, poden participar todos os veciños interesados no tema a tratar.
Nestas novas sesións, que terán lugar en diferentes centros de ensino de Fene, o tema a tratar serán «Os xogos en familia». Así, a sesión deste martes terá lugar entre as 16:00 e as 17:30 horas e celebrarase no CPI A Xunqueira. O mércores 20, entre as 17:30 e as 19:00 horas, no CEIP Os Casais e, o xoves 21, entre as 16:00 e as 17:30 horas, no CEIP Centieiras.
O obxectivo é procurarlles aos rapaces apoio e reforzo continuado para a adquisición de destrezas básicas no estudo e a adquisición de hábitos axeitados de cara a aumentar o rendemento e o éxito escolar, ao tempo que as súas familias participan e se implican neste proceso a través de reunións específicas.
É un programa motivador no que se traballan os puntos fortes de cada participante procurando apoio e ferramentas necesarias para o estudo e o desenvolvemento persoal, para potenciar as súas habilidades, a memoria, a atención, a comprensión, a motivación, o esforzo… así como as técnicas de estudo e a xestión do tempo.
Publicidad
