FERROL360 | Mércores 9 maio 2018 | 16:56
O Concello de Mugardos organiza para este domingo a derradeira saida da actual edición do programa Mugardos Camiña, que terá como destino as Fragas do Eume e o mosteiro de Caaveiro. A ruta de sendeirismo será de dificultade media e de catro horas de duración.
As persoas que desexen participar deberán presentarse ás nove da mañá diante do Concello, unha hora antes do habitual, para desplazarse desde alí xuntos ata o punto de partida da camiñata. A actividade é totalmente gratuíta e hai que inscribirse na OMIX ou ben enviar un correo electrónico a: deportes@concellodemugardos.gal.
Ao longo das súas diferentes edicións, o programa Mugardos Camiña ten contado coa participación de máis de duascentas persoas, aínda que a afluencia nas diferentes rutas de sendeirismo adoita estar entre as 30 e as 60 persoas.
A concelleira de Deportes, Dolores González, lembrou que esta é unha actividade que o Concello organiza en colaboración coa Asociación de Veciños Montefaro e que a finalidade é promover hábitos de vida saudables entre a veciñanza.
Outro dos obxectivos do programa é fomentar o coñecemento do patrimonio natural e histórico de Mugardos e a súa contorna. Nesta edición, as excursións tiveron como destino Caamouco, Ares, Chanteiro e a fervenza do Belelle, antes desta próxima ás Fragas do Eume.