FERROL360 | Xoves 21 xaneiro 2016 | 20:36
Alumnado do Instituto de Ensino Secundario Concepción Arenal de Ferrol estivo este xoves nas Aulas de Simulación da Xerencia Integrada de Ferrol, emprazadas no cuarto andar do Hospital Naval do Complexo Hospitalario Universitario de Ferrol.
Un total de 15 alumnos de segundo de bacharelato das materias de Ciencias da Terra e Bioloxía experimentaron cos distintos dispositivos cos que se forman os profesionais sanitarios e achegáronse ás nocións básicas de Soporte Vital Básico, e de como se enfrontar a situacións complexas de urxencia e emerxencia, como, por exemplo, atopar unha persoa inconsciente.
O ciruxián da Xerencia Integrada de Ferrol e coordinador das Aulas de Simulación de Ferrol, Ramón López de los Reyes, destacou a importancia de actividades deste tipo, nas que os máis novos de Ferrol coñecen como reaccionar ante unha urxencia e emerxencia: «Prodúcese un achegamento á sanidade pública; de feito, para moitos, era o primeiro contacto cun centro hospitalario», afirmou.
A simulación é recrear de forma artificial procesos reais para conseguir o obxectivo da aprendizaxe. Nela trabállase con manequíns, aparellos e materiais que simulan distintas partes do corpo sobre as que practicar. A simulación permite un primeiro coñecemento teórico da técnica que se vai realizar, e facelos primeiros adestramentos clínicos antes da súa aplicación real ó paciente.