FERROL360 | Domingo 21 agosto 2016 | 11:55
O Padroado de Deportes de Narón abrirá o 12 de setembro o prazo de inscricións da tempada 2016-2017 nas piscinas, escolas deportivas do pavillón, conveniadas, de clubes e ximnasio. En todo caso, o período para anotarse varía en función da actividade, así que tomade nota.
No caso das escolas deportivas do complexo polideportivo e piscina da Gándara e actividades de nado libre, ximnasia de mantemento, ioga, pilates e musculación, as reservas de praza para os usuarios que desexen continuar nas actividades, e teñen domiciliados os recibos, o cobro será entre os días 1 e 10 de setembro.
Os usuarios que non desexen continuar nas actividades deben comunicalo por escrito antes do 1 de setembro cubrindo o modelo que poderán atopar nas oficinas e na conserxería do polideportivo da Gándara.
As persoas que se anoten por primeira vez nas piscinas ou no ximnasio comezarán as actividades o 1 de outubro e poden inscribirse do 12 ao 30 de setembro no caso de ter bono familiar e residir en Narón. Para os veciños doutros concellos o prazo será do 19 ao 30 de setembro. En ambos casos poden anotarse en horario de 9:00 a 13:00, de luns a venres, no polideportivo da Gándara.
As inscricións para as escolas deportivas do pavillón e actividades conveniadas -balonmán, voleibol e ximnasia rítmica- abrirán o prazo para anotarse o 12 de setembro, ao igual que as escolas deportivas exteriores, actividades conveniadas e outras actividades de clubes -atletismo, tenis de mesa, tiro con arco, remo, xadrez, fútbol, fútbol sala, baloncesto, piragüismo, golf, badmintong, boxeo, kick boxing, tempo libre e patinaxe artística-.
As persoas que desexen recibir máis información poden dirixirse ao complexo polideportivo municipal da Gándara, no número 148 da estrada da Gándara, ou chamar ao teléfono 981.387.522. A medida do pasado ano nestas actividades foi de 3.000 usuarios.