FERROL360 | Mércores 2 outubro 2013 | 17:06
Unha proposta cultural diferente chega este xoves ao Centro Torrente Ballester. As habituais actuacións puramente musicais, que enchen semanalmente o ciclo Noites na Capela, abren paso a un espectáculo de danza contemporánea.
Cristina Montero e Rut Balbís dirixen Momento Blooming, un show que mistura o íntimo co superficial, a risa co pranto, a realidade coa ficción… Os opostos en torno á danza funcionan á perfección nesta experiencia innovadora que chega da man destas dúas artistas que aseguran ter a solución aos nosos problemas. A súa suxestión é contemplar o espectáculo onde «corpo, movemento, música e danza se xuntan para facer un cóctel anticrise».
A representación terá lugar este xoves ás 21:00 horas, e o custo das entradas é de 4 euros. Están á venda no despacho do teatro Jofre ou na páxina web do Concello de Ferrol.
