A Federación Comarcal de Ferrolterra de ANPAs de Centros Públicos denuncia o inicio de curso marcado por problemas de profesorado, falta de especialistas, obras pendentes e deficiencias nas infraestruturas de distintos colexios e institutos da comarca. A entidade fai balance da situación de varios centros e critica a xestión da Consellería de Educación, á que acusa de manter «o ensino público» nunha situación de deterioro.
As familias poñen sobre a mesa unha longa relación de problemas concretos en centros de Ferrol, Fene e Narón, entre outros puntos da comarca.
O Mosteiro de Caaveiro comeza sen especialista de Música
No CEIP Mosteiro de Caaveiro, a principal reclamación céntrase na falta dun especialista de Música. Segundo a Federación, a docente foi substituída por unha profesora de Primaria que non conta con esa especialidade.
As ANPAs aclaran que a crítica non se dirixe contra a docente, «que fará o seu traballo do mellor xeito posíbel», senón contra unha decisión que consideran que pode contribuír a empeorar a calidade do ensino e xerar desigualdades entre centros.
O ascensor do Esteiro, pendente e con obras en marcha
No CEIP de Esteiro, as familias celebran que finalmente se vaia acometer a instalación do ascensor que viñan reclamando, aínda que cuestionan os prazos. Segundo sinalan, as obras poderían prolongarse ata novembro.
A Federación critica que os traballos non comezasen antes, tendo en conta que o período estival ofrecía unha oportunidade para executalos con menor afección á actividade lectiva. As ANPAs advirten ademais das molestias que poden ocasionar as obras ao alumnado, profesorado e persoal non docente.
Neste mesmo centro, e tamén no CEIP de Ponzos, denuncian a falta dunha orientadora propia para cada colexio. Segundo explican, ambos os centros terán que compartir unha única profesional de orientación.
As familias do Ponzos tamén reclaman ao Concello de Ferrol que acometa o pintado dos pasos de peóns solicitado pola ANPA.
A Gándara: obras de rehabilitación pero tubaxes pendentes
Outro dos centros sinalados é o CEIP A Gándara, onde a Federación cuestiona que as obras de rehabilitación previstas non inclúan a renovación do sistema de tubaxes, que as ANPAs consideran que leva anos precisando unha substitución.
A entidade tamén critica que, mentres se acomete unha actuación cun investimento de 1,4 millóns de euros, se proceda á deshabilitación definitiva dunha unidade de 4º de Educación Infantil, o que suporía a perda dunha liña nun barrio no que existe, segundo denuncian, «un negocio privado concertado moi preto».
A Solaina e San Isidro, á espera de actuacións
No CEIP A Solaina, a Federación considera que continúa a situación de abandono que xa motivara mobilizacións durante o pasado curso. As ANPAs lamentan que esas protestas non se traducisen, polo momento, nas solucións reclamadas.
Unha situación similar, segundo a entidade, prodúcese no CEIP San Isidro, onde solicitan que se licite canto antes unha reforma do centro.
Neste caso engádese un problema concreto: o colexio dispón dun ascensor que nunca chegou a funcionar debido a fallos na construción, segundo denuncian as familias, que aseguran levar reclamando unha solución desde febreiro de 2025.
O CEIP Ledicia comeza o curso con cinco docentes sen cubrir
No CEIP Ledicia, a principal preocupación está relacionada co persoal. Segundo a Federación, o centro non puido contar ata o inicio do curso con cinco profesoras, tres delas de Educación Infantil, polo que parte destas funcións tiveron que ser asumidas polo propio equipo directivo. As ANPAs sinalan ademais que continúa sen cubrirse media xornada dun especialista en Audición e Linguaxe.
O IES de Fene, con máis de 3.000 sinaturas
A situación das infraestruturas tamén afecta aos institutos. No IES de Fene, as familias lembran que levan anos reclamando unha reforma para un edificio que consideran «moi danado».
A reivindicación chegou tamén á Xunta, onde o pasado mes de xullo foron entregadas máis de 3.000 sinaturas para reclamar unha actuación no centro.
As obras do IES As Telleiras, outra das preocupacións
No IES As Telleiras, con máis de 500 alumnos, a preocupación céntrase no inicio das obras de rehabilitación e no impacto que estas poidan ter sobre a actividade lectiva.
As familias reclaman que os traballos se executen con planificación suficiente para evitar que as obras obriguen a interromper as clases ou interfiran no normal funcionamento do instituto.
O Terra de Trasancos, entre o grego e as tubaxes
Tamén supera os 500 alumnos o IES Terra de Trasancos, que comezou o curso con dificultades para impartir a materia de Grego de 1º de Bacharelato.
Segundo explica a Federación, a autorización para impartir a materia chegou finalmente, pero a solución continúa pendente da incorporación do profesorado necesario. A intención, segundo sinalan, é que sexa impartida polo docente de Latín, aínda pendente de incorporación ao centro.
A isto súmase outro problema de carácter estrutural: as tubaxes do instituto precisan unha renovación completa, segundo as ANPAs, que aseguran que xa superaron a súa vida útil.
A Consellería tería ofrecido, segundo a Federación, un arranxo provisional e o compromiso de acometer a substitución durante o próximo verán. As familias reclaman agora que esa promesa quede por escrito.
As ANPAs destacan o caso do IES Sofía Casanova
Non todo o balance da Federación é negativo. As ANPAs destacan o caso do IES Sofía Casanova, onde valoran o traballo conxunto desenvolvido pola dirección e a asociación de familias para conseguir o obxectivo que se marcaran.
A entidade considera que neste caso a mobilización da comunidade educativa permitiu alcanzar un resultado satisfactorio e agarda que as obras rematen canto antes e sen incidencias, para que o centro poida iniciar unha nova etapa tras a súa transformación.
Unha lista de reivindicacións que pode medrar durante o curso
A Federación Comarcal de Ferrolterra de ANPAs de Centros Públicos advirte de que este primeiro balance non está pechado. Co inicio das clases, novas ANPAs incorpóranse aos centros e outras comezan a traballar coas novas direccións, polo que prevén que aparezan novas demandas ao longo das próximas semanas.
Entre as cuestións que quedan tamén no aire están as actividades que finalmente se incorporen ás Programacións Xerais Anuais (PXA) e aquelas que poidan quedar fóra por falta de tempo ou ser posteriormente cuestionadas pola súa suposta falta de neutralidade ideolóxica.
O balance das ANPAs sitúa así o inicio do curso escolar en Ferrolterra cunha longa relación de asuntos pendentes que van desde a falta de especialistas e profesorado ata ascensores, tubaxes, reformas integrais e obras que deberán convivir coa actividade lectiva.