LUIS CALVO | ‘Pensando en alto’ | Xoves 22 agosto 2013 | 21:50

Gustaríame saudar esa nova iniciativa chamada 360, un periódico dixital que tenta aportar unha nova imaxe de Ferrol dende unha das plataformas que máis chega hoxe en día á xente en todos os recunchos do país e fóra del, Internet. Pasaron aqueles tempos nos que a xente sinxela se enteraba de calquera cousa que tiña sucedido, e como saíra publicada no xornal de turno, en letra impresa era como palabra de Deus, pois viña na prensa.

Afortunadamente iso está boamente superado e calquera noticia que xurda no día, ponse inmediatamente en cuestión desde as plataformas dixitais, aparte de medios de comunicación e programas de radio e televisión. Nunca tan certo iso da aldea global. Así, independentemente do funcionamento das leis en cada momento e do país, así como do grupo dominante, sexa económico, relixioso ou político ninguén escapa á lei da opinión pública. Outra cousa como vimos de falar é a imposición da lóxica e da moral que non se da sempre, ou tarda en recoñecerse, pero o positivo é que a xente saiba a verdade e sexa quen de valorala.

Nesa liña vai o meu saúdo agarimoso e desexos de éxito a este grupiño de rapaces novos e cheos de ilusión que dende xa, esforzaranse día a día por ternos ao loro, aos veciños de
Ferrolterra, de canto suceda de interese noticiable, con rigor e profesionalidade. Así de sinxelo e difícil, máis con iso só, xa superaredes o 6,5 de Wert.

Non son quen para dar consellos, pero algo sei, por usado ou anos andados neste Ferrol dos nosos amores e desamores e voume referir aos movementos socioculturais tan vivos e presentes na dinámica das nosas comarcas.

Ferrol, e cando eu digo Ferrol sempre falo tamén dos pobos e vilas cercanas, iso que Alvaro Paradela nomeou como Ferrolterra, está a correr un grave risco de seguir a perder os sinais de identidade, esa imaxe de seu, que foron defendidas durante toda a vida por moitas persoas e entidades de todo tipo que veñen facendo a súa aportación á sociedade. Dicir, para aqueles foráneos que o descoñezan, que Ferrol posúe de sempre un tecido asociativo polo cal conta cunha importante vantaxe, a todos os niveis e sectores, que veñen facendo da zona un referente, dentro e fóra de Galicia.

Aí, é onde quero incidir pois penso que para calquera iniciativa emprendedora como é Ferrol360 conta cos compoñentes necesarios, sempre que os teña en conta, así como as súas opinións, dándolles voz para asegurar un bo e interesante resultado partindo dese rico patrimonio noso: histórico, social e cultural.

Ánimo e moita sorte!.

–

Luis Calvo Teijo é un ferrolán afeccionado á xestión cultural. Durante anos, foi directivo de diferentes entidades culturais coma o Ateneo Ferrolán ou o Toxos e Froles. É coautor do libro ‘Os cines na comarca de Ferrol-Eume-Ortegal. As súas xentes. Os seus recursos (1891-2010)’. Foi cofundador da Asociación Batalla de Brión e organizador do segundo centenario deste histórico suceso. Actualmente é presidente da Asociación Cultural Conxeito de Ferrol. Colabora periodicamente na sección de opinión ‘Pensando en alto’ do xornal dixital Ferrol360.