FERROL360 | Xoves 17 maio 2018 | 11:36
Navantia Australia abriu o pasado 27 de abril a súa primeira oficina internacional en Singapur. Esta oficina forma parte da estratexia de exportación de Navantia Australia nos países da rexión do sueste asiático.
A oficina foi inaugurada polo Alto Comisionado de Australia en Singapur, Bruce Gosper, quen encomiou os beneficios desta oficina en canto á exportación en materia de defensa. O presidente de Navantia Australia, Warren King, destacou o labor de expansión internacional de compañía que, a través de Navantia Australia, fixo posible esta nova incorporación.
Así mesmo, e dado que Navantia é o único estaleiro preseleccionado nos dous concursos de fragatas, para as Mariñas de Canadá e Estados Unidos, asegurou que a oficina de Singapur servirá de apoio aos mesmos.
Con esta instalación en Singapur, Navantia suma xa sete delegacións máis no estranxeiro, continuando coa súa vocación de ser unha empresa internacional. Con esta acción exterior, axuda a potenciar as exportacións españolas, o investimento estranxeiro directo e constitúe un escaparate tecnolóxico para a industria española no mundo.
Navantia desenvolveu a súa presenza a nivel internacional en liña coas oportunidades identificadas no sector militar de exportación destacando a súa presenza en países como Australia, Noruega, Arabia, Estados Unidos, Perú-Colombia, Venezuela e India.
Debate sobre el post