FERROL360 | Xoves 25 outubro 2018 | 9:51
O modelo de asistencia ó paciente crónico na área sanitaria ferrolá e a atención ó paciente psiquiátrico, en concreto á atención da esquizofrenia, foron proxectos finalistas a nivel nacional na XIII edición dos premios Best in Class (BIC) 2018, que se entregaron o martes en Santander.
Con estes premios, Gaceta Médica e a Cátedra de Innovación e Xestión Sanitaria da Universidade Rey Juan Carlos de Madrid «recoñecen publicamente o mellor centro de saúde, centro hospitalario, Servizo ou Unidade dentro do territorio nacional, tanto públicos como privados; que procuran a excelencia na atención que prestan ós seus pacientes».
A concesión dos diferentes premios baséase na valoración de proxecto ou na puntuación obtida polos candidatos a través do Índice de Calidade Asistencial ó Paciente (ICAP), que se establece a través dunha análise multivariable dos resultados obtidos nestes cuestionarios.
Evitar duplicidades
Nestes premios nacionais foi finalista, na categoría de coordinación asistencial, o novo modelo asistencial para o paciente crónico perfilado hai cinco anos na Xerencia Integrada de Ferrol, que ten como obxectivo dar mellor resposta a este paciente en tempo e forma, situándoo realmente como centro da atención, e evitándolles duplicidades de probas e visitas. Adaptouse o modelo de asistencia ás necesidades reais deses pacientes e familiares.
Premiouse un modelo asistencial, multidisciplinar, que aforra visitas ós pacientes, xa que aglutina as atencións nun mesmo ámbito, e no que está implicado a sección de crónicos (pertencente ó Servizo de Medicina Interna), coa consulta externa doutras especialidades, a hospitalización convencional, a hospitalización a domicilio (HADO), o Hospital de Día Médico (implementado no Hospital Naval hai tres) anos, os coidados paliativos e o Servizo de Farmacia.
Esta organización premiada aválase con datos obxectivos recompilados entre o ano 2013 e 2017, e que implicou a atención nese período dun total de 1.752 pacientes, que ten como perfil unha idade media de 82 anos, con discapacidade moderada, e onde a patoloxía predominante é a cardíaca, que afecta a en torno a dúas terceiras partes dos pacientes.
Comparando taxas de frecuentación, nos cinco anos de estudo, reducíronse nun 36,4% os ingresos médicos, e nun 46,4% as estancias medias no centro hospitalario, xa que agora estes pacientes teñen recursos máis directos e seguimento no Hospital de Día de, por exemplo, descompensacións, polas que antes acudían a diversas consultas varias veces, a urxencias, ou tiñan que ingresar no hospital cunha situación de maior complexidade.
Seguimento individual e precoz das psicoses
No que se refire á especialidade de Psiquiatría -premiada e finalista noutras tres ocasións-, valorouse a organización xeral do Servizo centrada na asistencia achegada e continuada dos pacientes con esquizofrenia.
Neste senso, o traballo de continuidade asistencial está centrado nas unidades de Saúde mental, no Hospital de Día Psiquiátrico e no ETAC (Equipo de Tratamento Asertivo Comunitario), que desenvolve programas de seguimento na comunidade de persoas que padecen un trastorno mental grave, como fundamentalmente a esquizofrenia ou o trastorno bipolar.
Valórase tamén a humanización da Unidade de agudos, buscando aproximarse ó funcionamento das outras plantas hospitalarias, cunha zona de hospitalización aberta; e tamén dispositivos ambulatorios como o Centro Día, pisos protexidos e unidades residencias que manteñen ós trastornos mentais estabilizados clinicamente cun crecente nivel de integración social e familiar. Xa se coñece que, cos pacientes emprazados nos ámbitos axeitados, estabilizados, e cunha maior integración social e familiar, ingresan menos polo seu proceso.
O seguinte paso é agora o seguimento integral, activo e temperá de pacientes que inician unha psicose, sobre todo aqueles que debutan cunha de tipo esquizofrénico, a máis habitual. Ponse o acento nas etapas previas, nos primeiros episodios, recalcando a intervención precoz, cun seguimento individual, alí onde estean os pacientes, para maior integración e normalización, e para reducir os tempos entre as primeiras manifestacións e o acceso ós tratamentos.
Esta intervención materializarase cunha busca activa por parte dos profesionais en contacto cos Unidade Infanto-Xuvenil, o entorno social, e medio escolar, para evitar que pasan desapercibidas unhas primeiras síntomas que fagan que se poida atrasar o tratamento máis axeitado.
Debate sobre el post